జగ దానంద కారకా

జగ దానంద కారకా జయ జానకి ప్రాణ నాయక ||పల్లవి||

గగనాధిప సద్కులజ
రాజ-రాజేశ్వర
సుగుణాకర సురసేవ్య
భవ్య-దాయక సదా సకల (జగదానంద)||అను పల్లవి||

అమర-తారక-నిచయ కుముదహిత
పరిపూర్ణానఘ సుర సురభూజ
దధిపయోధి వాస హరణ సుందరతర-వదన
సుధామయ వచో-వృంద గోవింద సానంద
మావరాజరాప్త శుభకరానేక (జగదానంద) || చరణం 1||

నిగమ-నీరజామృతజ-పోషకా-
నిమిష వైరివారిద-సమీరణ
ఖగ-తురంగ సద్కవి-హృదాలయా-
గణిత-వానరాధిప నతాంఘ్రియుగ ||చరణం 2||

ఇంద్రనీల మణి సన్నిభాపఘన
చంద్ర-సూర్య-నయనాప్రమేయ
వాగింద్ర-జనక సకలేశ శుభ్ర
నాగేంద్ర-శయన శమన-వైరి సన్నుత || చరణం 3 ||

పాద-విజిత-మౌని-శాప
సవ-పరిపాల వరమంత్ర-గ్రహణ-లోల
పరమ-శాంత సిద్ధ జనకజాధిప
సరోజభవ వరదాఖిల (జగదానంద) || చరణం 4||

సృష్టి-స్థిత్యంత-కారకామిత
కామిత ఫలదాసమాన గాత్ర
శచీపతినుతాబ్ధి మదహరా-
నురాగ రాగ-రాజిత కథా-సారహిత || చరణం 5 ||

సజ్జన-మానసాబ్ధి-సుధాకర
కుసుమ-విమాన
సురసారిపు కరాబ్జ లాలిత చరణా
వగుణాసురగణ మద-హరణ
సనాతనాజనుత || చరణం 6 ||

ఓంకార పంజర-కీర
పురహర సరోజభవ కేశవాదిరూప
వాసవ-రిపు జనకాంతక
కలాధర కలాధరాప్త ఘృణాకర
శరణాగత జన పాలన
సుమనోరమణ నిర్వికార
నిగమసారతర || చరణం 7 ||

కరధృత శర-జాలా
సుర మదాపహరణా
వనీ-సుర సురావన కవీన
బిలజ మౌని కృత చరిత్ర
సన్నుత శ్రీ త్యాగరాజనుత || చరణం 8 ||

పురాణ పురుష నృవరాత్మజా
శ్రిత పరాధీన
ఖర విరాధ రావణ విరావణా
నఘ పరాశర మనోహరా
వికృత త్యాగరాజ సన్నుత || చరణం 9 ||

అగణిత-గుణ కనక-చేల
శాల విదలనారుణాభ సమాన చరణా
పార మహిమాద్భుత
సుకవి-జన హృద్సదన
సుర-మునిగణ విహిత
కలశ నీరనిధిజా రమణ
పాప గజ నృసింహ
వర త్యాగరాజాది నుత || చరణం 10 ||

ఏమొకో చిగురుటధరమున

ఏమొకో చిగురుటధరమున ఎడనెడ కస్తూరి నిండెను

భామిని విభునకు వ్రాసిన పత్రిక కాదు కదా ||పల్లవి||

కలికి చకోరాక్షికి కడకన్నులు కెంపైతోచిన

చెలువంబిప్పుడిదేమో చింతింపరే చెలులు

నలువున ప్రాణేశ్వరుపై నాటిన యా కొనచూపులు

నిలువున పెరుకగ నంటిన నెత్తురు కాదు కదా ||చరణం 1 ||

పడతికి చనుగవ మెరుగులు పైపై పయ్యెద వెలుపల

కడుమించిన విధమేమో కనుగొనరే చెలులు

ఉడుగని వేడుకతో ప్రియుడొత్తిన నఖశశిరేఖలు

వెడలగ వేసవి కాలపు వెన్నెల కాదు కదా ||చరణం 2 ||

ముద్దియ చెక్కుల కెలకుల ముత్యపు జల్లుల చేర్పుల

వొద్దికలాగులివేమో ఊహింపరే చెలులు

గద్దరి తిరువేంకటపతి కౌగిట యధరామృతముల

అద్దిన సురతపు చెమటల అందము కాదు కదా ||చరణం 3 ||

జగడపు చనవుల జాజర

జగడపు చనవుల జాజర

సగినల మంచపు జాజర ||పల్లవి||

మొల్లలు తురుముల ముడిచిన బరువున

మొల్లపు సరసపు మురిపెమున

జల్లన పుప్పొడి జారగ పతిపై

చల్లే రతివలు జాజర ||చరణం 1 ||

భారపు కుచముల పైపైగడు సిం-

గారము నెరపేటి గంధవొడి

చేరువ పతిపై చిందగ బడతులు

సారెకు జల్లేరు జాజర ||చరణం 2 ||

బింకపు కూటమి పెనగేటి చెమటల

పంకపు పూతల పరిమళము

వేంకటపతిపై వెలదులు నించేరు

సంకుమదంబుల జాజర ||చరణం 3 ||

పిడికిట తలంబ్రాల

పిడికిట తలంబ్రాల పెండ్లి కూతురు కొంత ||పల్లవి||

పెడమరలి నవ్వీనీ పెండ్లి కూతురు

పేరుకల జవరాలీ పెండ్లి కూతురు పెద్ద

పేరుల ముత్యాల మెడ పెండ్లి కూతురు

పేరంటాడ్ల నడిమి పెండ్లి కూతురు విభు

పేరుకుచ్చ సిగ్గువడి బెండ్లి కూతురు ||చరణం 1||

బిరుదు పెండెము వెట్టె పెండ్లి కూతురు నెర

బిరుదు మగని కంటె పెండ్లి కూతురు

పిరిదూరి నప్పుడే పెండ్లి కూతురు పతి

బెరరేచి నిదివో పెండ్లి కూతురు ||చరణం 2||

పెట్టెనే పెద్ద తురుము పెండ్లి కూతురు నేడె

పెట్టెడు చీరలు గట్టి పెండ్లి కూతురు

గట్టిగా వేంకటపతి కౌగిటను వడి

వెట్టిన నిధానమయిన పెండ్లి కూతురు ||చరణం 3||

క్షీరాబ్ది కన్యకకు

క్షీరాబ్ది కన్యకకు శ్రీ మహా లక్ష్మికిని

నీరజాలయకును నీరాజనం ||పల్లవి||

జలజాక్షి మోమునకు జక్కువ కుచంబులకు

నెలకొన్న కప్పురపు నీరాజనం

అలివేణి తురుమునకు, హస్త కమలంబులకు

నిలువు మాణిక్యముల నీరాజనం ||చరణం 1||

పగటు శ్రీ వేంకటేశు పట్టపు రాణీయై

నెగడు సతి కళలకును నీరాజనం

జగతి నలమేల్ మంగ చక్కదనముల కెల్ల

నిగుడు నిజ శోభనపు నీరాజనం ||చరణం 2||

చరణ కిసలయములకు సఖియరంభోరులకు

నిరతమగు ముత్తేల నీరాజనం

అరిధి జఘనంబునకు అతివ నిజనాభికిని

నిరతి నానావర్ణ నీరాజనం ||చరణం 3||

నగుమోము గనలేని

నగుమోము గనలేని నా జాలి తెలిసి

నను బ్రోవగ రారాదా శ్రీ రఘువర నీ ||పల్లవి||

నగరాజధర నీదు పరివారులెల్ల

వొగి బోధన చేసే వారలు గారే యిటులుందుదురే నీ ||అను పల్లవి||

ఖగరాజు నీ యానతి విని వేగ చనలేడో

గగనాని కిలకు బహు దూరంబనినాడో

జగమేలే పరమాత్మ ఎవరితో మొరలిడుదు

వగ జూపకు తాళను నన్నేలుకోరా ||చరణం||

బంటు రీతి

రాగం: హంసనాదం తాళం: ఆది

బంటు రీతి కొలువీయవయ్య రామ ||పల్లవి||

తుంట వింటి వాని మొదలైన

మదాదుల బట్టి నేల గూల జేయు నిజ ||అను పల్లవి||

రోమాంచ మనే ఘన కంచుకము

రామ భక్తుడనే ముద్ర బిళ్ళయు

రామ నామ మనే వర ఖడ్గ మిచ్చి

రాజిల్లు నయ్య త్యాగరాజునికి ||చరణం||

http://www.youtube.com/watch?v=oSG781wrNH8

ఓడను జరిపే

ఓడను జరిపే ముచ్చట గనరే వనితలార నేడు ||పల్లవి||

ఆడువారు యమున కాడ కృష్ణుని గూడి

ఆడుచు బాడుచు నందరు జూడగ ||అను పల్లవి||

కొందరు హరి కీర్తనములు పాడ

కొందరానందమున ముద్దులాడ

కొందరు యమునా దేవిని వేడ

కొందరి ముత్యపు సరులసి యాడ ||చరణం 1||

కొందరు తడవడ పాలిండ్లు కదల

కొందరు బంగారు వల్వలు సడల

కొందరి కుటిలాలకములు మెదల

కొందరు పల్కుచు కృష్ణుని కథల||చరణం 2||

కొందరు త్యాగరాజ సఖుడే యనగ

కొందరి కస్తూరి బొట్టు కరుగగ

కొందరి కొప్పుల విరులెల్ల జారగ

కొందరి కంకణములు ఘల్లనగ ||చరణం 3||

బ్రహ్మ కడిగిన పాదము

బ్రహ్మ కడిగిన పాదము బ్రహ్మము తానే నీ పాదము

ఛెలగి వసుధ కొలచిన నీ పాదము

బలి తల మోపిన పాదము

తలకక గగనము తన్నిన పాదము

బలిరిపు గాచిన పాదము

కామిని పాపము కడిగిన పాదము

పాము తలనిడిన పాదము

ప్రేమపు శ్రీ సతి పిసికెడి పాదము

పామిడి తురగపు పాదము

పరమయోగులకు పరిపరి విధముల

వర మొసగెడి నీ పాదము

తిరు వేంకట గిరి తిరమని చూపిన

పరమ పదము నీ పాదము

భావములోన బాహ్యము నందును

భావములోన బాహ్యము నందును
గోవింద గోవింద యని కొలువవో మనసా


హరి యవతారములే అఖిల దేవతలు
హరి లోనివే బ్రహ్మాండంబులు
హరి నామములే అన్ని మంత్రములు
హరి హరి అనవో మనసా


విష్ణు నీ మహిమలే విహిత కర్మములు
విష్ణుని పొగడెడి వేదంబులు
విష్ణు డొక్కడే విశ్వాంతరాత్ముడు
విష్ణువు విష్ణువని వెదక వో మనసా


అచ్యుతుడితడే ఆదియు నంత్యము
అచ్యుతుడే అసురాంతకుడు
అచ్యుతుడు శ్రీ వేంకటాద్రి మీద నిదె
అచ్యుత అచ్యుత శరణనవో మనసా