ఓడను జరిపే

ఓడను జరిపే ముచ్చట గనరే వనితలార నేడు ||పల్లవి||

ఆడువారు యమున కాడ కృష్ణుని గూడి

ఆడుచు బాడుచు నందరు జూడగ ||అను పల్లవి||

కొందరు హరి కీర్తనములు పాడ

కొందరానందమున ముద్దులాడ

కొందరు యమునా దేవిని వేడ

కొందరి ముత్యపు సరులసి యాడ ||చరణం 1||

కొందరు తడవడ పాలిండ్లు కదల

కొందరు బంగారు వల్వలు సడల

కొందరి కుటిలాలకములు మెదల

కొందరు పల్కుచు కృష్ణుని కథల||చరణం 2||

కొందరు త్యాగరాజ సఖుడే యనగ

కొందరి కస్తూరి బొట్టు కరుగగ

కొందరి కొప్పుల విరులెల్ల జారగ

కొందరి కంకణములు ఘల్లనగ ||చరణం 3||