శ్రీ రామదాసు కీర్తనలు లేబుల్‌తో ఉన్న పోస్ట్‌లను చూపుతోంది. అన్ని పోస్ట్‌లు చూపించు
శ్రీ రామదాసు కీర్తనలు లేబుల్‌తో ఉన్న పోస్ట్‌లను చూపుతోంది. అన్ని పోస్ట్‌లు చూపించు

1, నవంబర్ 2010, సోమవారం

ఏ తీరుగ నను

ఏ తీరుగ నను దయ జూచెదవో ఇన వంశోత్తమ రామా
నా తరమా భవ సాగర మీదను నళినదళేక్షణ రామా ఏ తీరుగ...

శ్రీ రఘు నందన సీతా రమణా శ్రితజన పోషక రామా
కారుణ్యాలయ భక్త వరద నిను కన్నది కానుపు రామా ఏ తీరుగ...

క్రూర కర్మములు నేరక చేసితి నేరములెంచకు రామా
దారిద్ర్యము పరిహారము సేయవే దైవ శిఖామణి రామా ఏ తీరుగ...

వాసవ నుత రామదాస పోషక వందన మయోధ్య రామా
దాసార్చిత మా కభయ మొసంగవే దాశరథీ రఘు రామా ఏ తీరుగ...

15, అక్టోబర్ 2010, శుక్రవారం

రామచంద్రాయ మంగళం

రామచంద్రాయ జనక రాజజా మనోహరాయ
మామకాభీష్ట దాయ మహిత మంగళం
కోసలేశాయ మంద హాస దాస పోషణాయ
వాసవాది వినుత సద్వరాయ మంగళం
చారు మేఘ రూపాయ చందనాది చర్చితాయ
హార కటక శోభితాయ భూరి మంగళం
లలిత రత్న కుండలాయ తులసీ వనమాలికాయ
జలజ సదృశ దేహాయ చారు మంగళం
దేవకీ సుపుత్రాయ దేవదేవో దత్తమాయ
పావనా గురువరాయ సర్వ మంగళం
పుణ్డరీకాక్షాయ పూర్ణచంద్ర వదనాయ
అండజా వాహనాయ అతుల మంగళం
విమల రూపాయ వివిధ వేదాంత వేద్యాయా
సుముఖ చిత్త కామితాయ శుభ మంగళం
రామదాసాయ మృదుల హృదయ కమల వాసాయ
స్వామి భద్ర గిరివరాయ సర్వ మంగళం

14, అక్టోబర్ 2010, గురువారం

పాహి రామ ప్రభో


పాహి రామ ప్రభో పాహి రామ ప్రభో
పాహి భద్రాద్రి వైదేహి రామ ప్రభో
పాహి రామ ప్రభో

ఇందిరా హృదయారవిందాది రూడ
సుందరాకార నానంద రామ ప్రభో
ఎందునే చూడ మీ సుందరానందము
కందునో కన్నులింపొంద శ్యామ ప్రభో

బృందారకాది బృందార్చిత పదార
విందముల సందర్షితానంద రామ ప్రభో
తల్లివీ నీవే తండ్రివీ నీవే
మా ధాతవు నీవు మా భ్రాత రామ ప్రభో

నీదు బాణంబులను నాదు శతృల బట్టి
బాధింపకున్నావాదేమి రామ ప్రభో
ఆది మధ్యాంత బహిరంతరాత్ముడనుచు
వాదింపునే జగన్నాథ రామ ప్రభో

శ్రీ రామ రామేతి శ్రేష్ట మంత్రము
సారె సారెకును వింతగా చదువు రామ ప్రభో
శ్రీరామ నీ నామ చింతనామృత పాన
సారమే నా మది గోరు రామ ప్రభో

కలికి రూపము దాల్చి కలియుగంబున
నీవు వెలసితివి భద్రాద్రి నిలయ రామ ప్రభో
అవ్యయుడ వైన ఈ అవతారముల వలన
దివ్యులైనారు మునులయ్య రామ ప్రభో

పాహి శ్రీరామ నీ పాద పద్మాశ్రయుల
పాలింపుమా భద్రశీల రామ ప్రభో
పాహి రామ ప్రభో పాహి రామ ప్రభో
పాహి భద్రాద్రి వైదేహి రామ ప్రభో


పలుకే బంగార మాయనా

పలుకే బంగార మాయనా కోదండ పాణి
పలుకే బంగార మాయె పిలచిన పలుక వేమి
కలలో నీ నామ స్మరణ మరవ చక్కని తండ్రి ||పల్లవి||

ఇరువుగ ఇసుకలోన బొరలిన ఉడుత భక్తికి
కరుణించి బ్రోచితి వని నెర నమ్మితి నిన్నే తండ్రి ||చరణం 1||

రాతి నాతిగ జేసి భూతలమున
ప్రఖ్యాతి చెందితివని ప్రీతితో నమ్మితి తండ్రి ||చరణం 2||

ఎంత వేడిన గాని సుంతైన దయ రాదు
పంతంబు సేయ నే నెంతటి వాడను తండ్రి ||చరణం 3||

శరణాగత త్రాణ బిరుదాంకితుడవు గాదా
కరుణించు భద్రాచల వర రామదాస పోష ||చరణం 4||

12, అక్టోబర్ 2010, మంగళవారం

నను బ్రోవమని చెప్పవే

నను బ్రోవమని చెప్పవే సీతమ్మ తల్లి
నను బ్రోవమని చెప్పవే
నను బ్రోవమని చెప్పు నారి శిరోమణి
జనకుని కూతురా జనని జానకమ్మ

నను బ్రోవమని చెప్పు నారి శిరోమణి
జనకుని కూతురా జనని జానకమ్మ

ప్రక్కన చేరి చెక్కిలి నొక్కుచు
చక్కగా మరి కేళి జొక్కి యుండు వేళ

లోకంత రంగుడు శ్రీకాంత నిను గూడి
ఏకాంతమున ఏక శయ్య నున్న వేళ

అద్రిజ వినుతుడు భద్ర గిరీశుడు
నిద్ర మేల్కొను వేళ నెలతరో భోధించి

నను బ్రోవమని చెప్పవే సీతమ్మ తల్లి
నను బ్రోవమని చెప్పవే