శ్రీ త్యాగరాజ కీర్తనలు లేబుల్‌తో ఉన్న పోస్ట్‌లను చూపుతోంది. అన్ని పోస్ట్‌లు చూపించు
శ్రీ త్యాగరాజ కీర్తనలు లేబుల్‌తో ఉన్న పోస్ట్‌లను చూపుతోంది. అన్ని పోస్ట్‌లు చూపించు

15, అక్టోబర్ 2010, శుక్రవారం

మరుగేలరా ఓ రాఘవ

రాగం: జయంతశ్రీ
తాళం: దేశాది

మరుగేలరా
ఓ రాఘవ ||పల్లవి||

మరుగేల చరాచర రూప పరాత్పర
సూర్య సుధాకర లోచన ||అను పల్లవి||

అన్ని నీవనుచు అంతరంగమున
తిన్నగా వెదకి తెలుసుకొంటినయ్య
నిన్నే గాని మది నెన్న జాలనొరుల
నన్ను బ్రోవవయ్య త్యాగరాజ నుత ||చరణం||

సామజ వర గమన

రాగం: హిందోళం తాళం: ఆది

సామజ వర గమన సాధు హృత్
సారసాబ్జ పాల కాలాతీత విఖ్యాత ||పల్లవి||

సామ నిగమజ సుధా మయ గాన విచక్షణ ||అను పల్లవి||
గుణ శీల దయాలవాల మాం పాలయ

వేద శిరో మాతృజ సప్త స్వర
నాదాచల దీప స్వీకృత
యాదవ కుల మురళీ వాదన
వినోద మోహన కర త్యాగరాజ వందనీయ ||చరణం||

సీతా కల్యాణ వైభోగమే

రాగం: శంకరాభరణం తాళం : ఝంప

సీతా కల్యాణ వైభోగమే
రామ కల్యాణ వైభోగమే ||పల్లవి||

పవనజ స్తుతి పాత్ర పవన చరిత్ర
రవి సోమ వర నేత్ర రమణీయ గాత్ర (సీతా) ||చరణం 1||

భక్త జన పరిపాల భరిత శర జాల
భుక్తి ముక్తి ద లీల భూ దేవ పాల (సీతా) ||చరణం 2||

పామరాసుర భీమ పరిపూర్ణ కామ
శ్యామ జగదభిరామ సాకేత ధామ (సీతా) ||చరణం 3||

సర్వ లోకాధార సమరైక వీర
గర్వ మానవ దూర కనకాగ ధీర (సీతా) ||చరణం 4||

నిగమాగమ విహార నిరుపమ శరీర
నగ ధరాఘ విదార నత లోకాధార (సీతా) ||చరణం 5||

పరమేశ నుత గీత భవ జలధి పోత
తరణి కుల సంజాత త్యాగరాజ నుత (సీతా) ||చరణం 6||

14, అక్టోబర్ 2010, గురువారం

సమయానికి తగు మాటలాడెనే

రాగం : ఆరభి తాళం : ఆది

సాధించెనే ఓ మనసా ||పల్లవి||

భోధించిన సన్మార్గ వచనముల
బొంకు జేసి తా పట్టిన పట్టు ||అను పల్లవి||

సమయానికి తగు మాటలాడెనే
దేవకీ వసుదేవుల నేకించినటు(సమయానికి)

రంగేశుడు సద్గంగా జనకుడు
సంగీత సంప్రదాయకుడు (సమయానికి)

గోపీ జన మనోరథ మొసంగ లేకనే
గేలియు జేసే వాడు(సమయానికి)

వనితల సదా సొక్క జేయుచును
మ్రొక్క జేసే పరమాత్ముడదియు గాక
యశోద తనయుడంచు ముదంబునను
ముద్దు పెట్ట నవ్వుచుండు హరి (సమయానికి)

సారాసారుడు సనక సనందన
సన్ముని సేవ్యుడు సకలాధారుడు (సమయానికి)

పరమ భక్త వత్సలుడు సుగుణ
పారా వారుండాజన్మ మనఘుడీ
కలి బాధల తీర్చువాడనుచు నే
హృదాంబుజమున జూచుచుండగ (సమయానికి)

హరే రామచంద్ర రఘుకులేశ
మృదు సుభాష శేషశయన
పర నారీ సోదరాజ విరాజ తురగ
రాజ రాజ నుత నిరామయాప ఘన
సరసీరుహ దళాక్షయనుచు
వేడుకొన్న నన్ను తా బ్రోవకను (సమయానికి)

శ్రీ వేంకటేశ స్వప్రకాశ
సర్వోన్నత సజ్జన మానస నికేతన
కనకాంబర ధర లసన్మకుట
కుండల విరాజిత హరేయనుచు నే
పొగడగా త్యాగరాజ గేయుడు
మానవేంద్రుడైన రామచంద్రుడు (సమయానికి)

సమయానికి తగు మాటలాడెనే
సద్భక్తుల నడతలిట్లనెనే
అమరికగా నా పూజ కొనెనే అలుక వద్దనెనే
విముఖులతో చేర బోకుమనెనే
వెత గల్గిన తాళు కొమ్మనెనే
దమ శమాది సుఖ దాయకుడగు శ్రీ
త్యాగరాజ నుతుడు చెంత రాకనే (సాధించెనే) ||చరణం ||


గంధము పుయ్యరు గా

గంధము పుయ్యరు గా
పన్నీరు గంధము పుయ్యరుగా ||పల్లవి||

అందమైన యదు నందనుపై
కుందరదన లిరువొందగ పరిమళ ||అను పల్లవి||

తిలకము దిద్దరు గా కస్తూరి తిలకము దిద్దరు గా
కల కలమను ముఖ కళ గని సొక్కుచు
పలుకుల నమృతము లొలికెడి స్వామికి ||చరణం 1||

చేలము గట్టరు గా బంగారు చేలము గట్టరు గా
మాలిమితో గోపాలబాలులతో
నాల మేపిన విశాల నయనునికి ||చరణం 2||

హారతులెత్తరు గా ముత్యాల హారతులెత్తరు గా
నారీ మణులకు వరము యౌవన
వారకమొసగెడు వారిజాక్షునికి
పూజలు చేయరు గా మనసార పూజలు చేయరుగా
జాజులు మరి విరిజాజులు దవనము
రాజిత త్యాగరాజనుతునికి ||చరణం 3||

13, అక్టోబర్ 2010, బుధవారం

జగ దానంద కారకా

జగ దానంద కారకా జయ జానకి ప్రాణ నాయక ||పల్లవి||

గగనాధిప సద్కులజ
రాజ-రాజేశ్వర
సుగుణాకర సురసేవ్య
భవ్య-దాయక సదా సకల (జగదానంద)||అను పల్లవి||

అమర-తారక-నిచయ కుముదహిత
పరిపూర్ణానఘ సుర సురభూజ
దధిపయోధి వాస హరణ సుందరతర-వదన
సుధామయ వచో-వృంద గోవింద సానంద
మావరాజరాప్త శుభకరానేక (జగదానంద) || చరణం 1||

నిగమ-నీరజామృతజ-పోషకా-
నిమిష వైరివారిద-సమీరణ
ఖగ-తురంగ సద్కవి-హృదాలయా-
గణిత-వానరాధిప నతాంఘ్రియుగ ||చరణం 2||

ఇంద్రనీల మణి సన్నిభాపఘన
చంద్ర-సూర్య-నయనాప్రమేయ
వాగింద్ర-జనక సకలేశ శుభ్ర
నాగేంద్ర-శయన శమన-వైరి సన్నుత || చరణం 3 ||

పాద-విజిత-మౌని-శాప
సవ-పరిపాల వరమంత్ర-గ్రహణ-లోల
పరమ-శాంత సిద్ధ జనకజాధిప
సరోజభవ వరదాఖిల (జగదానంద) || చరణం 4||

సృష్టి-స్థిత్యంత-కారకామిత
కామిత ఫలదాసమాన గాత్ర
శచీపతినుతాబ్ధి మదహరా-
నురాగ రాగ-రాజిత కథా-సారహిత || చరణం 5 ||

సజ్జన-మానసాబ్ధి-సుధాకర
కుసుమ-విమాన
సురసారిపు కరాబ్జ లాలిత చరణా
వగుణాసురగణ మద-హరణ
సనాతనాజనుత || చరణం 6 ||

ఓంకార పంజర-కీర
పురహర సరోజభవ కేశవాదిరూప
వాసవ-రిపు జనకాంతక
కలాధర కలాధరాప్త ఘృణాకర
శరణాగత జన పాలన
సుమనోరమణ నిర్వికార
నిగమసారతర || చరణం 7 ||

కరధృత శర-జాలా
సుర మదాపహరణా
వనీ-సుర సురావన కవీన
బిలజ మౌని కృత చరిత్ర
సన్నుత శ్రీ త్యాగరాజనుత || చరణం 8 ||

పురాణ పురుష నృవరాత్మజా
శ్రిత పరాధీన
ఖర విరాధ రావణ విరావణా
నఘ పరాశర మనోహరా
వికృత త్యాగరాజ సన్నుత || చరణం 9 ||

అగణిత-గుణ కనక-చేల
శాల విదలనారుణాభ సమాన చరణా
పార మహిమాద్భుత
సుకవి-జన హృద్సదన
సుర-మునిగణ విహిత
కలశ నీరనిధిజా రమణ
పాప గజ నృసింహ
వర త్యాగరాజాది నుత || చరణం 10 ||

నగుమోము గనలేని


నగుమోము గనలేని నా జాలి తెలిసి
నను బ్రోవగ రారాదా శ్రీ రఘువర నీ ||పల్లవి||

నగరాజధర నీదు పరివారులెల్ల
వొగి బోధన చేసే వారలు గారే యిటులుందుదురే నీ ||అను పల్లవి||

ఖగరాజు నీ యానతి విని వేగ చనలేడో
గగనాని కిలకు బహు దూరంబనినాడో
జగమేలే పరమాత్మ ఎవరితో మొరలిడుదు
వగ జూపకు తాళను నన్నేలుకోరా ||చరణం||

బంటు రీతి

రాగం: హంసనాదం తాళం: ఆది

బంటు రీతి కొలువీయవయ్య రామ ||పల్లవి||

తుంట వింటి వాని మొదలైన
మదాదుల బట్టి నేల గూల జేయు నిజ ||అను పల్లవి||

రోమాంచ మనే ఘన కంచుకము
రామ భక్తుడనే ముద్ర బిళ్ళయు
రామ నామ మనే వర ఖడ్గ మిచ్చి
రాజిల్లు నయ్య త్యాగరాజునికి ||చరణం||

ఓడను జరిపే

ఓడను జరిపే ముచ్చట గనరే వనితలార నేడు ||పల్లవి||

ఆడువారు యమున కాడ కృష్ణుని గూడి
ఆడుచు బాడుచు నందరు జూడగ ||అను పల్లవి||

కొందరు హరి కీర్తనములు పాడ
కొందరానందమున ముద్దులాడ
కొందరు యమునా దేవిని వేడ
కొందరి ముత్యపు సరులసి యాడ ||చరణం 1||

కొందరు తడవడ పాలిండ్లు కదల
కొందరు బంగారు వల్వలు సడల
కొందరి కుటిలాలకములు మెదల
కొందరు పల్కుచు కృష్ణుని కథల||చరణం 2||

కొందరు త్యాగరాజ సఖుడే యనగ
కొందరి కస్తూరి బొట్టు కరుగగ
కొందరి కొప్పుల విరులెల్ల జారగ
కొందరి కంకణములు ఘల్లనగ ||చరణం 3||